هالقصيدة هي عبارة عن قصة واقعية لأعز اصدقاء الشاعر طارق المحياس.. وهي حزينة ومأثرة ..
::: ياسمـــين :::
ليش قلبك يا بعد عمري حزين
والله موب لايق عليك هذا الزعل
يا حلاتك يوم انتي تضحكين
افتحي قلبك وقولي وش حصل
من تجرأ؟ من قطف هالياسمين؟
من حرمها الزين قبل لا يكتمل؟
من كسر قلبه وشعوره بكلمتين؟
و يدري قلبه للعتب ما يحتمل
منهو أرخص قيمة الغالي الثمين؟
ويدري انه في عيوني له محل
ومن يقول الحب ما يقطر حنين؟
ومن يقول انه وسط قلبي ذبل؟
يلا قومي يلا لا تتكاسلين
خلي حلمي وياك يوصل لزحل
يلا قومي يلا لا تتشاورين
خلي حبنا يكون للعالم مثل
قالت اصبر قلت انتي تامرين
و طالعتني بعين يملاها الوجل
ولا اراديا ذرفت دمعتين
وقالت ان الزين ابد ما يكتمل
قلت قولي لي ترى سرك دفين
ما بخبر حد لو مهما حصل
بس دخيلك ما ابي هالدمع يبين
موب عشان شي بس والله ما احتمل
طالعتني وقلت لها شتطالعين
مافي داعي للعواطف والخجل
هذا موب وقته في ويهي تسرحين
جاوبي احساس قلبي اللي سأل
قالت الشدة بعد فترة تلين
والفرح يقبل اذا باقي امل
والشقا لازم في يوم انه يهين
والصعب يأتيه وقت يكون سهل
قلت لها قوليلي ولا تلمحين
ما احب اسمع كلام به جدل
قولي شالموضوع اذ انك تسمحين
وخلي الخوف اللي فيني يرتحل
قالت اهلي ساوموني بدرهمين
وقرروا انهم يزوجوني بعجل
جا خطبني شخص بعمري مرتين
و جابوا المأذون والعقد اكتمل
وافقوا لانهم بماله طامعين
وبالتجارة والمراكز والفلل
ليش لا؟ دام انهم هم اللي الرابحين
يمكن انهم يطلعون بكم محل
قالت الحقني الحقني ومد لي هاليدين
ضاع سكري و طار من راسي العقل
من لي غيره اشتكيله يابغنين
عطني رايك عطني لو ذرة امل
صرت انا وياك ضمن التايهين
والحزن في دربنا توه استهل
ليش يا دنيا في وجهي تعبسين
حظي المايل متى بس يعتدل
قالت تكلم ولو بس جملتين
لا تتم ساكت ترا وردي ذبل
قول لي اي شي قول لو كلمتين
وانت بس اللي لامره امتثل
صدمتي كانت معاها صدمتين
صدمتي كانت في هالمرة دبل
كنت بسألها شرايك تملكين
دام اخذنا الدبلة والحب اكتمل
ما نطقت بشي وانا ميت حزين
والدمع من فوق وجناتي همل
قمت اشاهق ما ابي نوحي يبين
كني خيل باعلى صرخاته صهل
قمنا نطالع بعض عين بعين
ما تكلمنا الين الليل حل
قالت انطق لا تقول انزين انزين
وانا ساكت والفرح عني رحل
كنت اظن احنا لبعضنا مكملين
ما دريت ان الحظ عاند بالفعل
كنت انا وحدي في عالمها سجين
وكنت اقول الحظ اخيرا اعتدل
قلت لها اذكر كلامك لين الحين
يوم تقولي لي تراك احسن رجل
صحت فجأة وقلت لها تتذكرين
يوم كنا نخطط لشهر العسل؟؟
قلت عشاني قومي ولا تزعلين
وارضي بالواقع ما دام انه حصل
اسمك بيبقى وسط قلبي دفين
والقمر لازم في يوم بيكتمل
والله بفرح دام انتي بتفرحين
يلا خلينا بعرسك نحتفل
و صفعتني كف عالخد والجبين
وقالت انت قاعد تكلم طفل؟
قلت لها وصوتي بنبراته حزين
اوعديني هالزعل اخر زعل
لان قلبك ينعرف يوم انك تزعلين
والله موب لايق عليك هذا الزعل
ومهما ناديتك ابد لا تجاوبين
قصة الحب انتهت انتهت مات البطل
افترقنا بعد كل هذي السنين
وللاسف حبنا في هالمرة فشل
انتهى مشوار احلى عاشقين
كل بدربه لكن ما وصل
كل واحد ينسى مع مر السنين
لكن الذكرى امرها موب سهل
لين اخر يوم في عيني تسكنين
لين اخر يوم في قلبي تسكنين
لين اخر يوم في روحي تسكنين
وصورتك تبقى مثل بدر اكتمل
في بعض الاوقات اقعد مستكين
بس افكر لين يدبحني الملل
بالفعل قطفوا زهور الياسمين
قطفوا الزهرة قبل ما تكتمل
20/8/2007, 18:47
